人生第一次嘅零分，就係小學英文默書。
唔記得當時係因為唔記得溫書定覺得自己會識，
總之就係講出黎阿爸阿媽唔會接受到嘅原因，
最後拎住好似大雄嘅零分試卷返屋企。
好記得當年同阿爸阿媽講默書零分嘅一幕。
佢兩個好似考官咁坐喺梳化，
而我就拎住份卷企喺佢地面前，
成身震晒好驚比人用藤條打。
最後，
佢地竟然放我一條生路，
剩係問左我「諗住點做」，
我就話「會記熟啲先重考」。
重考嘅成績我唔記得，
只係知合格返。
呢件事我記一世，
因為當時考嘅英文生字，
全部都係麥當勞嘅嘢食。
而我細個，
阿爸阿媽唔係好比我食麥當勞。