【失敗小故事】失敗像極了棉花糖

我有一個夢想,就係推動關注快樂嘅文化。我嘗試過唔同嘅方法,拍片、做講座、甚至去外地訪問不同國家嘅人嘅快樂之道,但效果都未如理想。每一次我以為將理念解釋得好清楚嘅時候,得到嘅回應通常都先係客氣嘅微笑,之後就係一臉迷茫問:「好有意義嘅諗法,但係其實係做咩架?」

為左令到理念更加落地,我決定舉辦一個香港快樂節 —— 一個平台提供親身體驗「快樂」嘅機會。我參加各樣嘅基金起動比賽,屢敗屢戰。終於,俾我揾到一個機會!我可以免費借用中環海濱場地一日搞香港快樂節,合作伙伴都聯絡好,活動訂喺2020年陽光普照嘅8月舉行。

然後,疫情2020年1月喺香港開始爆發。

然後,就冇然後了…

當初嘅失敗經歷,中間發生左咩事(轉捩點)令你有唔同嘅睇法呢?

然後冇了然後,我嘅滿心期待、憧憬頓時泡湯。我以為,經歷多次嘗試,終於可以初嚐實踐嘅機會。點知…

我好失落。

雖然我知全世界人同我一樣都因為疫情打亂左計劃,但係始終難免覺得洩氣。

直到,有一次與朋友閒談,講起疫情底下好多計劃都延誤咗,但係反而可以慢落嚟,更專注做好每一件事。我開始諗,或者今次快樂節搞唔成,都俾左我機會去準備得更加充足,未嘗唔係一件好事。

失敗好似棉花糖咁,一食落口就覺得好甜,味道甜得凝結在喉嚨,令人不舒服。但係好快隨着棉花糖溶化,連個味道係咩都已經記唔起。最後,食過棉花糖呢件事,都只不過係一個記唔起嘅曾經…